哈囉！唔驚唔覺又過咗一個禮拜啦喎，中秋節過得幾好嗎？有冇食月餅呢？大家有冇掛住我呀？雖然中秋節咗，我喺呢度都同大家補返句中秋節快樂！言歸正傳，又係嘅時候帶大家去食好西啦，準備好未呀？馬上出發！Let's Go！
今次要帶大家嚟尖沙咀嘅The One….「吓？尖沙咀，旅客區㗎喎？唔係呀嘛？又多人、啲野又貴，瞳瞳你係咪傻咗呀？」咪住先，邊個話尖沙咀一定多人㗎？同埋多人就唔可以去㗎啦咩？聽埋我講先啦，真係值得去食㗎！
尖沙咀嘅The One四樓有間專賣日本班戟同厚多士，叫「Gram」嘅甜品店。以甜品店嚟講佢啲裝潢都真係幾靚，附近啲無障礙設施都做得好足，係細間左少少，但係整體評分都可以比滿分㗎！
Um….其實我都唔知可以叫佢做乜嘢店好(>_<")，因為佢賣嗰啲班戟同厚多士都幾大份！我第一次同男朋友一齊嚟食，叫咗烤蘋果配紅茶忌廉班戟 、朱古力香蕉厚多士，再加多杯芒果沙冰，食到我哋係咁話：「好飽呀～！」(P.S：我男朋友仲要係幾「拆」得嗰type)。
有見及此，如果喺Gram度食完跟住再要食正餐嘅朋友們，我喺度強烈建議兩個人share一份，如果唔係真係會食唔落正餐㗎！
其實嗰度嘅限定都值得一試，就等我推介下呢個每日3點幾先限量出售嘅 「premium smile pancake」嘞！
「唓！咪又係有舊舊梳乎厘，只不過些面多咗啲雜果，下面多咗條cream同餅仔啫！有幾premium呀？」嘖嘖嘖！做人唔可以以貌取cake，呢三層梳乎厘其實有唔同嘅餡喺入面，食落去個口感同味道都唔同㗎！
首先係入口即溶牛奶cream餡梳乎厘，你一咬開完舊梳乎厘之後嗰啲充滿住牛奶味嘅cream慢慢溶落你條「利」度，係咪聽見都覺得好肚餓呢？
跟住再落第二層，係好多人都唔會抗拒嘅朱古力餡梳乎厘，將梳乎厘慢慢咬開就會有凍冰冰嘅朱古力漿流去個口，同x記新地嘅朱古力漿完全唔同，唔會甜到乸喉㗎，個人最鍾意呢層！
最後就係熱辣辣嘅蛋黃流心餡梳乎厘，因為佢係預客人由上至下食，所以食完頭兩層先食最底層嘅時候舊梳乎厘唔會太凍太熱，啱啱好食得，再加埋下面嗰條cream一齊食口入面冰火交替，你都咪話唔過癮！唯一要小心嘅係咬開左個梳乎厘之後蛋黃會滴落件衫度，建議切開嚟食會比較方便！
好！今日嘅推介就到呢度，下星期再會，要掛住我㗎！啾咪<3
以為咁就完？其實仲有每晚6點幾嘅限定可以推介比大家！
登登！就係呢個，梳乎厘班戟嘞！先將嗰杯仔嘅糖醬淋喺班戟面，見到啲糖漿慢慢向下流，幾治癒下㗎！食嗰連埋啲cream一齊放入口，超好食！
好啦！呢次真係完，仲未夠喉？要等下星期再post啦，敬請拭目以待！(^V^)