周末動人-由義遊到帶輪椅媽媽出遊 孝順女：想陪佢睇吓呢個世界

王海如是典型背包客，在國際義工服務機構「義遊」工作，攞正牌帶隊週遊列國，足跡遍及逾20個國家包括土耳其及亞美尼亞 。「以前無諗過同媽咪去旅行，會俾藉口自己，覺得人工唔高，儲多幾年錢先」。直至媽媽確診患上「小腦退化症」，身體機能不斷退化，以為仍有時間，其實不然。停薪留職半年，帶半生勞碌的媽媽出遊，慶幸仍未太遲。「想陪佢睇吓呢個世界！」推着輪椅，在京都楓葉下漫步、踏足早已是老香港卻從未去過的長洲。世界很大，只恨時間太少。

「媽媽！你嘅夢想係咩？」一次偶然機會，看到一個有關夢想計劃的廣告，海如問媽媽。「我希望你做官，快啲嫁人……」慈母的即時反應，還是關於女兒，小妮子哭笑不得，只好再解釋：「我係問你有咩想做」。從未出國的媽媽歎口氣：「我都老了，又坐輪椅，不就等你幾個放假，帶我周圍走吓。」「咁你最想去邊？」「日本！鄉里話風景好靚。」就是這樣的閒話家常，成就兩母女出遊的約定。
「媽媽同我好似，都對世界好奇，佢後生時對香港好奇，今日嘅我對世界好奇」。海如說：「過去幾個月，了解多咗」。2012年理大中文及雙語系畢業，三兄弟姐妹排中間，像大部份年輕人，喜歡週遊列國，看不同國家文化，聽不同人的故事，偏偏對自己父母，所知甚少。「我未出世爸爸已過身，細個只會諗將來，諗吓將來做咩工作」。
直至四年前，50歲的媽媽確診患病，她不諱言是轉捩點。「愈近嘅地方愈會忽略，試過飲完茶，同媽媽出中環，我話去離島，先知媽媽嚟咗香港廿幾年，長洲都無去過」。陪媽媽出入醫院，因而與媽媽獨處，她聽了很多從未聽過的家族故事：關於早逝的爸爸、關於關係疏離的婆婆公公，還有關於媽媽年輕時對繁華香港的美好憧憬。「唔係因為旅行，都唔會傾到呢啲，好想同佢返一次鄉下汕尾」。
尋根，像是上世紀的詞語。自小家貧的海如，16歲已半工讀，在快餐店工作，她直言小時候與媽媽關係疏離。「以前細個唔會諗阿媽獨力照顧我哋幾艱難，只知佢返幾份工，好唔得閒」。送外賣、倒垃圾，在地盤做雜工，全都是體力勞動的工作。「我記得有個農曆年，阿媽一個人要倒成幢樓嘅垃圾，嗰時細佬仲細，我同哥哥要去幫手」。
但海如說，家裡再窮都好，未試過捱餓。「媽媽好注重我哋學業，學校要買電腦，左湊右湊都一定要買」。她與哥哥相繼考上大學，哥哥畢業後做社工，她在非牟利機構工作。只是，子女陸續出身，這個病卻找上王媽媽，半生勞碌為生活，無緣放眼世界，未及享清福，已被困輪椅。「最初唔知係小腦退化，開始時成日無端端跌親，以為只係太攰」。由懷疑到確診，路途漫長，海如說，四年間，見證能頂半邊天的媽媽，由堅持以傘代拐杖，到後來改用助行架；兩年前，終於得坐輪椅代步，手眼亦開始不協調。
「小腦退化影響平衡力，其他身體功能都會慢慢退化」。日劇《一公升的眼淚》， 正是以此病為題材。由於是遺傳病，她與哥哥及弟弟都有一半機會患病。面對家族宿命，海如說已有心理準備，倒是媽媽比自己更看不開。「佢唔肯接受訪問，係怕你會問起呢個病」。面對未可知的未來，她說：「媽媽50歲發病，我仲有廿幾年，會好好諗點樣過，就算將來行唔到、睇唔到嘢，都唔會後悔」。
放眼世界，讓她擁有不一樣的人生觀。「細細個已問自己，係咪讀好書、搵份政府工然後結婚生仔，就係最好嘅人生？」在她心中，錢重要但不是最重要。「媽媽嘅病，令我覺得過有意義嘅生活，更加重要」。人生苦短，小妮子謂希望能為自己而活，讓所愛的人快樂。「帶媽媽去旅行，係好小嘅夢想，就算無資助都會去，但原來幾微小都好，只要大聲講出嚟，真係會有人和應你」。獲批「今生不做機械人夢想基金」的海如笑着說。