離島出遊有感

喺剛剛上星期日即係 12月16日結束左既大嶼山週末之旅，真係好開心能感受大佛好風光呀，亦喺今次旅程上有額外既收穫!
果日天氣仲要啱啱好，唔會有猛太陽，而且天陰陰但無落雨，天公做美~
今次仲要係我第一次上冠忠無障礙復康巴士去離島玩，旅程亦相當有意思，旅途上我認識到唔同既傷殘人士，仲搵到鍾意打卡既志同道合><

縱使大家出處唔同，但有一個交集點就係大家都喜愛出遊，喜愛香港呢個地方，樂於享受交流既美好時光。
我們雖然談不上深交，而且年齡上亦有差距，但心境上同樣係活潑開朗，無所不談~
所以話志趣相投係無分年齡，年齡只係個數字啫，同時講到傷健共融亦唔係件難事，大家可以用相同步伐去走呢趙旅程，一路上大家各取所需，即使行動不便走得慢，但往往比健全人士更留意每個地方，更容易察覺別人看不到既事與物，佢哋都係可依靠既同行者。

從她們身上我學識放慢腳步，多觀察和欣賞沿途既事物，更學懂善用隨機應變既能力 ; 做事踏實，行動上唔好太心急。

其實我既行動力再配上她的穩重，一快一慢，就剛剛好咧。好開心她唔厭棄我呢個唔太受力既「人肉扶手」，會體諒我力氣上既不足，我從中亦感受到做照顧者既責任好重大，因為我喺果一刻係她行動上既依靠，支撐她身體既重要支柱，我感應到她走既每一步都相當沉重，她出左唔少汗，但顯然而見她既意志力比我既行動力還要強，我捉實她強而有力既手，她就捉實瘦骨如柴既我，明顯她比我更用力，感受到她對我充滿信心，沒有一句扶得她唔舒服既怨言，查實喺那刻既我正每走一步隻手都在發抖......。

她堅持，擁有百分百出遊既勇氣，無懼行走萬里路，只係怕身邊無願意一齊慢走既陪同者。

回想當日，她卻比旅程還要讓我感到深刻......